Jokin Altuna amezketarrak profesional mailara saltoa eman du. Aspe enpresarekin hiru urteko kontratua sinatu du 18 urteko pilotariak, eta ekainaren 24an, San Joan egunez, egingo du debuta Eibarren. Astelena pilotalekuan jokatuko den jaialdian, Barriola izango du bikote, eta Titin III eta Tolosa anoetarraren aurka arituko da.
Kontratua sinatzearekin batera, Altuna "oso pozik" dagoela azaldu du Aspek. "Aukera bikaina da hau. Pilotari ororen ametsa da, eta ongi aprobetxatu nahi dut. Pixkanaka hobetzen joan nahi dut. Kontzeinte naiz ez dela erraza izango, baina oso motibatuta nago", esan du amezketarrak.
Profesional mailan debuta egin aurretik, afizionatu gisa beste bi neurketa garrantzitsu jokatuko ditu. Asteartean, Bergarako Hiria txapelketako finalaurrekoak jokatuko ditu, eta ostiralean, Biharko Izarrak txapelketako finalean izango da Mallabian.