Udalbatzak testuan zehazten duenez, "Euskal Herrian garai politiko, ziklo politiko berri baten irekiera bizitzen ari gara, benetako eta egiazko demokrazia eta bakea lortze bidean. Behingoagatik eta betirako, Euskal Herriak bizi duen gatazka politikoa konponduko duen ziklo politiko berri bat". Irati Mujikaren kasuan bezalako atxiloketak "ez dute tokirik izan behar garai berriotan. Horrelako ekinbideak, hain justu, aurkako norabidean doaz".
Azken hilabeteotan ezagutu diren "erabaki historikoak ikusita, eta Aieten ospatu zen Nazioarteko Konferentzia mugarri izanik, non nazioarteko komunitateak gatazka gainditzeko norabidea marraztu duen", udalbatzak "ulertezina" ikusten du Irati Mujika atxilotu eta espetxeratu izana.
Irati Mujika gazte mugimenduaren baitan egindako lan politikoagatik atxilotua izan dela azaldu du mozioan. "Ekinbide politikoagatik diren epaiketa eta espetxe-zigorrek ezin dute tokirik izan. Are gutxiago egun bizi ditugun itxaropenezko garaiotan", gaineratu du udalbatzak.
"Eskubide guztiak guztiontzat" eta "eskubide zibil eta politikoak guztiontzat" eskatu du mozioaren bidez. "Irati Mujika eta euren ekinbide politikoagatik espetxeratuak dauden eta epaituak izaten ari diren euskal herritarrentzat ere", gaineratu du.
Guztiei dagokiela "garai politiko berriari" ekarpena egitea esan du udalbatzak, "euskal preso politikoen Euskal Herriratzea agenda politikoan dagoenean eta Euskal Herriko gehiengo politiko, sozial eta sindikalak exijitzen duen unean, Irati Mujikaren atxiloketaren gisako ekintzak aurkako norabidean eragiten dute".
Euren jarduera politiko hutsarengatik Euskal Herriko herritarren sektore zabalen aurkako "jazarpen eta eskubideen urraketa", berehala eta behin betiko eten ditzaten exijitu dio udalbatzak "Estatu Espainol eta Frantsesari". Aramaioko Udalbatzak ere mozio bere onartu du.