Iruñeko Labrit pilotalekuan amezketarrek jarri dute giroa, bai kantxan, eta baita harmailetan ere. Saralegi partida irabazten hasi da eta 10-5eko abantaila ere izan du. Olaizola ez zen ari ematen bere onena, eta Saralegik, berriz, maila oso ona erakutsi du. Olaizolak, baina, txapeldun handia zergatik den erakutsi du eta hamarreko berdinketa lortu du.
Bazirudien goizuetarrak aurrera erraz egiteko aukerak zituela, baina amezketarrak ez dio utzi. Berriz ere aurretik jarri da Saralegi, eta azkenean 15eko berdinketara iritsi dira. Olaizolak hurrengo tantoa, eta gero Saralegik. 16na egin ondoren, aurretik jarri da amezketarra, bi tantoko abantaila hartuz.
Labriten amezketarrak zoratzen jarri dira. Ezustekoa gertu zegoen, Saralegik txapelketa handi baten finalera igarotzeko aukera garbiak zituen, eta, gainera, Olaizola II.aren aurka jokatuz. Orduan goizuetarrak beste pauso bat eman du eta hurrengo sei tantoak segidan egin ditu. Akabo Saralegiren ametsa, baina harro egon daiteke amezketarra, txapelketa bikaina egin baitu eta estu hartu du finalaurrekoan Olaizola II.a.