Ekaitz Saralegi, Lau T'erdiko Pilota Txapelketako finalaurrekoetara

Tolosaldeko Ataria 2013ko aza. 18a, 13:41
Ekaitz Saralegik 22-17 irabazi dio Mikel Idoateri Lau t'erdiko txapelketako final-laurdenetako ligaxkako azken partida, eta finalerdietarako txartela lortu du. Amezketako pilotariak Aimar Olaizola izango du aurkari finalerdietako kanporaketan.

Partida boladaka joan zen. Saralegik indartsu ekin zion norgehiagokari (3-1), baina Idoatek garaiz erantzun zuen, eta partida berdintzea lortu zuen (3-3). Ondoren, Idoate izan zen abantaila hartu zuena (4-7), baina Saralegik lehia parekatu zuen, zazpina (7-7). Idoatek berriro abantaila hartzea lortu zuen (8-11), eta Saralegik, behera etorri beharrean emaitza irauli zuen, 6-0eko partzialarekin (15-11).

Saralegik partida bideratuta uzteko aukera izan zuen 15-11koarekin, baina Idoate azkeneraino borroka egiteko prest azaldu zen, eta aldeak murriztu zituen (15-14). Idoate momentu onenean egon zenean, mahai gainean kolpea eman zuen Saralegik bost tanto jarraian eginda (20-14). Norgehiagoka maldan gora jarri zitzaion Idoateri, baina Txantreako pilotariak ez zuen etsi eta partida estutu egin zuen (20-17). Aurkariaren erantzuna ikusita Saralegi ez zen urduri jarri, eta, ondorioz, garaipena (22-17) eta finalerdietarako txartela lortu zituen.

34 urteko amezketarra lehen aldiz iritsi da Lau t'erdiko Txapelketako finalerdietara.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!