Minbiziaren Aurka Gipuzkoan elkarteak Villabonan egindako urteko diru bilketan parte hartu zuten pertsona guztiei eskerrak eman nahi dizkie haien eskuzabaltasunagatik. Diru bilketaren helburua minbizia duten pertsonei babesa ematea da; ikertzaile, osasun-langile, boluntario, psikologo eta gizarte-langileekin konpromisoa hartzea eta ikerketa onkologikorako dirua biltzen laguntzea.
Guztira, 1.140 euro bildu zituzten. Hainbat boluntariok hartu zuten parte ekimen solidario honetan, herrian zehar banatuta zeuden mahaietan. Era berean, urtero egindako ekimen honek herritarren artean elkartearen presentzia handitzeko eta elkarteak egunetik egunera pazienteen eta hauen senideen onurarako egindako lana ezagutarazteko aukera ematen du.
Hortaz, Minbiziaren Aurka Gipuzkoanetik boluntario guztiei eskerrak eman nahi dizkiete elkartea bultzatzen egiten duten lanagatik, bai ekimen honetan eta baita beste batzuetan parte hartuz.
Lortutako baliabideak ikerketa onkologikorako eta elkartearen doako zerbitzuak sustatzeko erabiliko dira.
Aurtengo kanpaina
Gelditzen zarenean, minbiziaren aurka mugitzen gara lelopean, aurtengo kanpainak keinu batek duen balioan jartzen du arreta. «Elkartearen itsulapiko edo eskaera mahai baten aurrean gelditzeak keinu txikia dirudien arren, ikerketa bultzatzeko, arreta hobetzeko eta itxaropena sortzeko mugimendu kolektibo oso bat aktibatzen du».
Diru bilketa honen bitartez lortutako funtsei esker, ikerketa onkologikoarekin lotutako proiektuen finantzazioa, paziente eta hauen senideak artatzeko programa eta gaixotasunaren prebentziorako eta detekzio goiztiarreko kanpainen jarraipena bermatzen da. Era berean, elkarteak eskaintzen dituen zerbitzuen doakotasuna mantentzeko ere ezinbestekoa da. Gainera, jardun guzti honek ahalbideratuko du elkarteak helburu duen minbiziaren % 70eko biziraupena lortzen.