Beste urte batez, arrakasta handia izan du Villabonako Santio festetako Santiotan Kantari ekimenak. 10:00etan Olaederra kiroldegitik abiatuta, kantujira egin dute, aurten, Santiago egunez. Herriko zenbait kale eta plazatan saio txikiak egin ondoren, Txistulari plazan amaitu dute. Euskarazko kantu ezagun ugari abestu dituzte, musikarien laguntzarekin, eta kantujirari amaiera emateko, ekimenaren izena daraman abestia kantatu dute: Santiotan Kantari.
Bestetik, eguerdian, Loatzo musika eskolako bandak emanaldia egin du Erreboteko plazan. Zenbait pieza ezagun interpretatu dituzte, eta txistulariek ere parte hartu dute. Amaitzeko Villabonako martxa bezala ezagutzen den Dulce despertar abestia jo dute.