Amasa-Villabonako Udalak Villabona.eus udal webgunea eraberritu eta eraldatu du, eta dagoeneko erabilgarri dago sarean. Udal ordezkariek adierazi dutenez, aurrekoa baino webgune «arinagoa, errazagoa, intuitiboagoa eta modernoagoa» da oraingoa, garai berrietara egokitua.
Plataforma berria udal informaziorako sarbidea hobetzeko eta udalaren eta herritarren arteko komunikazioa errazteko sortu dute.
Webgune berriak udalaren zerbitzu eta informazio guztiak mantentzen ditu baina, horrez gain, hainbat berrikuntza eta hobekuntza gehitu dizkiote, edukietarako sarbidea errazteko eta erabiltzaileei esperientzia arinagoa eta hurbilagoa emateko.
Gehitutako berrikuntza nabarmenen artean, galdutako objektuen atal berri bat dago. Bertan Udaltzaingoak aurkitu eta bulegoan gordeta dituen objektuak argitaratuko dira, jabeek errazago aurkitu eta berreskuratu ditzaten galdutako objektu horiek. Era berean, kexak eta iradokizunak egiteko gune berri bat ere sortu da. Horren bidez, herritarrak udalarekin harremanetan jarri daitezke iritziak, eskakizunak, proposamenak, kritikak edo udal zerbitzuekin lotutako beste edozein gai helarazteko.
Gainera, web orri berriak hemeroteka ere badu. Bertan 2012. urtetik udalak bere webgunean argitaratutako berri guztiak irakurri daitezke. Horrela, iraganeko informazioa gorde eta eskuragarri mantenduko da.
Udalaren webgune berriaren garapena eta diseinua Elkarmedia enpresak egin du. Komunikazio digitala berritzeko eta hobetzeko proiektu hau aurrera eramateko 9.534 euroko inbertsioa egin dute.
Udal arduradunek adierazi dutenez, atari digital berria eguneratzeko lanak ez dira guztiz amaitu eta oraindik informazioa falta da gehitzeko. Datozen asteetan atal desberdinak osatu eta eduki berriak gehituko zaizkio, herritarrek udal informazio guztia modu argi eta eguneratuan eskura dezaten.