Igandean Loatzoko XXXII. Igoera-Jaitsiera mendi lasterketa izango da, Uxo-Toki elkarteak eta Amasako Martina Kultur Elkarteak antolatuta. Inguruko mendi lasterkarientzako xarma handia duen proba da Amasan hasi eta bukatzen den proba. Parte hartzaileak 10:30ean hasiko dira, eta aurretik 9,73 kilometroko ibilbidea izango dute. Lasterketaren izenak dioen moduan, Loatzo mendiraino igoko dira, 2,5 kilometroko aldapa pikoa igoz, eta ondoren Amasara jaitsiko dira ibilbide leunago bat erabiliz. Guztira 583 metroko desnibel positiboa gaindituko dute mendi lasterkariek.
Izena egunean bertan eman behar da, 09:00etatik aurrera Uxo-Toki elkartean bertan, eta doan da. Lehen hiru gizonezko eta emakumezkoentzat sariak izango dira: lehenengoek txapela eta 120 euro, bigarrenek 80 euro eta hirugarrenek 50 euro. Horrez gain, babesleek eskainitako hainbat produkturekin zozketa egingo da proba amaitzean. Ohiturari jarraiki, Loatzoko gurutzearen inguruan hamaiketakoa izango da nahi duten guztientzat. Mendi lasterketako parte hartzaileek hamaiketako oparoa izango dute Amasan, proba amaitu eta gero.