Villabonako Oinkari dantza taldeak antolatuta, Dantzari Eguna ospatu dute eguerdian Behar Zana pilotalekuan. Emanaldi ederra egin dute bertako nahiz eskualdeko beste herri batzuetatik joandako 250 haur eta gaztetxok. Askotariko dantzak egin dituzte, Euskal Herriko zenbait txokotan jatorria dutenak. Berez, kalejira bat egiteko asmoa zuten emanaldiaren aurretik, baina bertan behera utzi dute eguraldiagatik.
Oinkari dantza taldeak Villabonan duen dantza eskolako haur eta gaztetxoak ez ezik, Asteasuko eta Adunako dantza eskoletakoak ere aritu dira. Gainera, billabonatarrek eskualdeko beste hiru dantza taldetako haur eta gaztetxoak gonbidatu dituzte: Lizartzako Otsolar, Alegiako Sutarri eta Zizurkilgo Bukalai dantza taldeetakoak. Guztira, 250 dantzari inguruk parte hartu dute aurtengo ekitaldian; musikariak, irakasleak eta dantza taldeetako gainerako ordezkariak batuta, 280 lagun elkartu dira frontoian.