Ahoa birrinduta eta matrailezurra hautsita. Ertzaintzak gertutik jaurtitako pilotakada batek zauri larriak eragin zizkion Aritz Ibarrari, urriaren 12an Falange Espainolak Gasteizen eginiko manifestazioaren aurkako protestetan. Xuhar herri plataformak elkartasun eta besarkada bidali die Gasteizko gertakarietan zauritutako guztiei, baita matrailezurrean tirokatua izan zen Aritz Ibarra gazteari ere.
«Xuhar eskuineko begitik itsu utzi zutenetik urte eta erdira, ustez herritarren segurtasuna erdietsi behar duten horiek Tolosako inauterietan ikusi genituen jokabide berdinak praktikan jartzen jarraitzen dute. Indarkeria poliziala modu neurrigabean erabiltzen eta herritarren segurtasuna ezbaian jartzen jarraitzen dute», esan dute herri plataformako kideek. Ikerketa justu bat eskatu dute, «beste behin inpunitatea gailendu ez dadin».
Amaitzeko «gizatasuna» eskatu zieten arduradun politikoei, biktimarioak babestu ez daitezen eta ez dadin biktima kriminalizatu. «Nekatuta gaude Ertzaintzaren jokabide bidegabeaz, nekatuta gaude indarkeria polizial neurrigabe eta inpuneaz, nekatuta gaude egunak joan eta egunak etorri albistegietan hezur hautsiez, begi lehertuez eta zaurituez entzuteaz».