Amasamendira mendi martxa antolatu dute iganderako, urriaren 5erako, poligono eolikoaren behin-behineko kokapena bisitatzeko. 09:00etan abiatuko dira Amasako plazatik eta proiektuak eragingo lituzkeen kalteen inguruan hausnartuko dute parte hartzaileek.
Abuztuaren 6an Amasa-Villabonako Udalean entregatu zituen Amasamendi Bizirik taldeak uztaileko azken bi asteetan bildutako sinadurak. 1.548 jaso zituzten. Sinatzaileek Amasamendiko poligono eolikoaren proiektua bertan behera uztea eta Premier Group enpresarekin harremanak eteta eskatu zuten.
«Elkarteko kideok proiektuaren aurkako lanean jarraitzen dugu, ez baitugu interse pribatuen mesedetan gure mendiak kaltetzea onartuko», aipatu dute Amasamendi Bizirik taldetik eta, bide batez, datorren igandeko mendi martxan parte hartzera deitu dituzte herritarrak.