Aranzadi Zientzia Elkarteko kideak Amasako Garmendiko koban lanean aritu dira, eta aurtengo ekinaldiko aurkikuntzarik nabarmenena azken Neolito-Kalkolito garaiko suharrizko gezi punta bat izan da. Jon Aldaia Aranzadiko kide eta arkeologoak zuzentzen du indusketa eta bertan lanean aritu dira Karlos Almorza, Jexux Bidaola, Joxe Luis Iraola, Esther Lopez, Andoni Mateos eta Pako Barrio.
Aldaiak azaldu du aurkikuntza horrek baieztatzen duela historiaurreko gizakiek Loatzo mendialdeko baliabideak ustiatzen zituztela duela 5.000-4.000 urte inguru. Gezi punta ez da hori adierazten duen lehen aztarna, izan ere, Aranzadiko taldeak duela bi urte hilobi koba txiki bat aurkitu zuen Irurako Laskibar auzoan, giza-hezur eta zeramika arrastoekin. Zentzu berean, joan den urtean Loatzon aurkitutako Irañetako tumuluaren berri ere eman zuten. Nola tumulua, hala hilobi koba Neolitotik-Brontze Arora arte hildakoak gordetzeko erabili zituzten.
Aldaiak azaldu du aztarna guzti horiek —bailarako beste hainbatekin batera— agerian uzten dutela ingurua «modu nahiko intentsiboan» ustiatzen zutela garai hartarako. Dagoeneko bukatu dute aurtengo Garmendiko kobako ekinaldia: «Horrelako gezi-puntak ohiko materiala dira, Alkiza inguruan ere topatu izan ditugu. Baina hauek dira Amasa inguruan topatu ditugun aztarna zaharrenak. Tumulua, berriz, oraindik ez dugu induskatu».
