Udako solstizioa ospatzeko ekitaldia antolatu zuen joan den astelehen gauean Villabonako Zunbeltz kale antzerki taldeak. Herriko kaleetan ibili ondoren, Erreboteko plazan egin zuten emanaldian, pirotekniarekin arazoak izan zituzten.
Taldeko kideek aitortu dute petardo batzuk aurreikusitako ibilbidetik aldenduta atera zirela. «Gertaera hori ustekabeko istripua izan zen, inolako asmorik gabekoa eta piztearen ardura zuten pertsonen kontroletik kanpo».
Benetan sentitzen dutela gaineratu dute: «Gertakariak Villabonako herritarrengan eragin izan zuen edozein susto edo trabagatik sentitzen dugu». Horrekin batera, norbaitek kalteren bat jasan badu haiekin harremanetan jartzeko eskatu dute.
Amaitzeko herritarren ulermena eskertu eta ilusioz publiko guztiarentzako kultur eta jai jarduerak eskaintzeko lanean jarraituko dutela hitz eman dute.