Lesaka eta Iruñea arteko bidea egiten ari da Sare herritarra gaur-biharretan erregimen itxian dauden euskal presoen udalerriak batuz. Eguerdian Amasa-Villabonatik igaro da Puzzlea osatu arte ekimena eta handik Lizartzako bidea hartu du.
Gaur egun dauden 117 euskal presoetatik, 58 ari dira betetzen zigorra erregimen itxian; salbuespen araudia ezartzen dietela salatu du Sarek, eta nabarmendu du, «lege arrunta ezarriko balitzaie denak erregimen irekian leudekeela». 58 euskal preso horien jaioterri diren 29 udalerriak elkartzen ari dira asteburu honetan.
Amasa-Villabonan bi hitzordu egin dituzte ekitaldiaren aurretik: bata Iratzarren mokadua hartzekoa; eta bestea, berriz, Onddo Gazte Asanbladakoena –gaztetxearen urtemuga ospatzen ari gaur eta triki-poteoa egin dute Malkar plazaraino–. Han egin dute ekitaldi nagusia.
Lizartzan 13:30ean giza-katea egin dute eta bazkaritan bildu dira ondoren.