Maiatzaren 10ean, Oinkari dantza taldeak bere 50. urteurrena ospatzeko ekitaldien barruan Lorezainen konpartsa aterako du. Tartean bazkari herrikoia egingo dute, 14:30ean Txermingo ikastola azpian. Parte hartu nahi dutenek izena eman ahalko dute egunotan.
Apirilaren 26an eta maiatzaren 3an, 10:30etik 12:00etara ikastolako ganbaran egin ahal izango da izena eta momentuan ordaindu, edo bestela, ordainketa transferentzia bidez egin eta ordainagiria harremanak@oinkari.eus helbidera bidali beharko da. Maiatzaren 3a izango da izen emateko azkeneko eguna.
Bi menu izango dira aukeran: 15 urte artekoentzat bat, 15 euroan; eta 16 urtetik aurrerakoentzat bestea, 25 euroan. Zeliakoren bat egongo balitz, izena ematerakoan jakinaraztea eskatu dute antolatzaileek.
Hau da Oinkari dantza taldekoek maiatzaren 10erako antolatu duten egitaraua:
- 11:00. Konpartsa herrikoiaren irteera Txermingo ikastolatik.
- 14:30. Bazkari herrikoia, Txermingo ikastola azpian.
- 17:30. Irteera, Txermingo ikastolatik.
- 18:00. Konpartsa herrikoiaren emanaldia, Errebote plazan.