Ertzaintzak 23 eta 24 urteko hiru pertsona atxilotu zituen atzo Villabonan, beste pertsona bati lapurreta egitea egotzita. Ertzaintzatik adierazi dutenez, atzo 16:30ak aldera herritar batek poliziaren laguntza eskatu zuen Tolosako tren geltokian. Herritarrak agenteei esan zien liskarren bat izan zela tren bagoi batean.
Une horretan, poliziek trena gelditzeko eskatu zuten, beharrezko frogaketak egiteko, eta eskuan eta buruan zituen zaurietatik odola zeriola zegoen gazte bat aurkitu zuten. Biktimaren arabera, bidaian bost gazte hurbildu zitzaizkion eta arma zuri batekin eraso egin zioten, eta objektu pertsonalak eta dirua zeramatzan maleta bat kendu zioten. Antza, gazteak Villabonako geltokian jaitsi ziren, eta horietako hiru Ertzaintzaren beste patruila batek atzeman zituen, eta indarkeria erabiliz lapurreta egitea leporatuta atxilotu zituen.
Ertzaintzak esan duenez, polizia-aurrekari ugari dituzte atxilotuek, eta datozen orduetan eramango dituzte epailearen aurrera. Ertzaintzak eginbideak irekita ditu indarkeria erabiliz egindako lapurretan inplikatuta dauden beste bi pertsonak identifikatu eta atxilotzeko.