Euskal Herria subjektu juridiko-politiko gisa eta euskal herritarrek beren etorkizuna askatasunez erabakitzeko duten eskubidea modu eraginkorrean aitortzeko, Espainia eta Frantziako estatuen aurrean estatus politiko berri bat lortzea bultzatu nahi du Amasa-Villabonako Udalak, gaur egun Euskal Herria osatzen duten hiru errealitate politiko-administratiboetatik abiatuta eta bakoitzaren borondate kolektiboak errespetatuz.
Udalbatzak azkeneko osoko bilkuran adierazi duenez, funtsezko gai hauek jaso behar ditu Espainiako konstituzioaren beharrezko erreformak: Espainiako estatuaren forma politikoa aldatzeko aukera eta Errepublikaren aukera gaitzea; Espainiako estatuaren hainbat nazioen izaera eta, ondorioz, herriek duten erabakitzeko eskubidea aitortzea; eta Euskal Herriak demokratikoki eta bere borondatez estatus politiko berria adosteko egin behar duen prozesuan Espainiar estatuak oztoporik ez jartzeko bermeak artikulatzea.
Osoko bilkuran mozioa 11 botorekin onartu zen, EH Bilduren eta EAJren aldekoekin eta PSE-EEko aurkako bakarrarekin. «Hasiera batean EAJ alderdiak mozio propioa aurkeztu zuen udalbatzan jorratzeko baina, aurretik, EAJ eta EH Bildu adostasun batera heldu ziren eta azkenean bien arteko mozio bateratu bat aurkeztu zuten», aipatu dute udaleko iturrietatik.