Amasa-Villabonako Aizkardi mendi elkarteak 56. Mendi Martxa antolatu du. Martxoaren 30ean egingo dute eta, urtero bezala, bi ibilbide prestatu dituzte: bata luzea, 45 kilometrokoa; eta bestea laburra , 22 kilometrokoa.
Ibilbide luzea, 24. Euskal Herriko Iraupen Luzeko Ibilaldien Zirkuiturako baliagarria izango da –14 urtetik gorakoentzat–. 2.500 metroko desnibela izango du eta, gutxi gora behera, 10 ordutan egin beharko dute parte hartzaileek. Villabonako erdigunetik 07:00etan aterako dira –ordu aldaketagatik adi egoteko gomendioa luzatu dute antolakuntzatik–.
Ibilbide motzean ateratzen direnek, berriz, 08:00etan izango dute irteera. 1.100 metroko desnibela duen ibilbidea sei bat ordutan burutu beharko dute. Besteak beste, Villabona, Eskatzu, Andatza, Juanasoro, Atxulondo, Belkoain eta Basopetatik pasako dira, berriro Villabonara jaisteko.
Aizkardiko martxan parte hartu nahi dutenek informazio guztia Aizkardi.com helbidean izango dute eta izena emateak Zirkuitua.com helbidean egin beharko dituzte martxoaren 28a baino lehen.
