Piano-jotzaileen topaleku izan da gaurkoan Villabonako Gurea antzokia. EHME Euskal Herriko Musika eta Dantza Eskolen Elkarteak piano jaialdiak antolatu ditu Euskal Herriko hainbat herritan asteburu honetan, eta Villabonako jaialdia antolatzeko ardura hartu du Loatzo musika eskolak. Bada, bi txandatan banatuta, 50 piano-jotzaile zuzenean entzuteko parada izan da.
Loatzo musika eskolako ikasleekin batera, Hernaniko udal musika eskolakoak eta Zegamako Toberakoak igo dira pianoa zegoen taula gainera. Banan bana igotzen joan dira parte hartzaileak, eta bakoitzak pieza bat jo du trebezia handiz, bertaratu direnen gozamenerako. Bukaeran, diploma eta zapi bana eta goxokiak banatu dizkiete guztiei.
