Herriko Burdina, Euskal Herriko Heavy Metalaren atariak iragarri duenez urtea bukatzearekin batera itxiko ditu ateak Villabonako Rainbow tabernak. Agur esateko askotariko emanaldiak prestatu eta zuzeneko bi iragarri dituzte: gaur, abenduaren 27an, Tolosako Burni Jotzaileak taldea ariko da 20:00etatik aurrera; eta bihar, abenduaren 28an, festa pribatua egingo da, 19:00etatik aurrera, Basati eta Meliora taldeekin.
Rock gogorraren eta heavy metalaren zaleen txoko estimatuetako bat izan da azken urteetan. Hiru hamarkadako ibilbide luzeari segida emateko duela lau urte Pablo Eguzkizak hartu zuen tabernaren martxa. Arduradun berriak 50 kontzertu baino gehiago antolatu ditu Rainbowen eta, gainera, Hellbona jaialdiaren sorrera bultzatu du.
2024arekin batera agurtuko da Villabonako Kale Nagusian dagoen taberna.