Ohiturari jarraituz, herri bazkaria egiten ari dira une honetan, Amasan, San Martin festen azken egunean. Aurrez, goizean, Martina kultur elkarteak antolatuta, gazteen arteko desafioa egin dute. 15 lagun elkartu dira plazan, eta hiru taldetan banatuta, gutxitan ikusten diren probak egin dituzte. Triatloi moduko bat egitea zen antolatzaileen asmoa. Amasan igerian egin ezin denez, longboard baten gainean joan dira; ondoren, korrika, baina atzeraka; gero, bizikleta txikien gainean; eta azkenik, lasto-fardoen gainean plaza bat osatu behar izan du talde bakoitzak.
Lehia estua aurreikusten zen, eta polemikarako tartea ere izan da. Ia talde guztiak aritu dira azpijokoan, baina talde grisak lasto-fardoetako bat hautsi du, eta ondorioz, kaleratua izan da. Amaierako metroetan, gauzak estu izan dira talde gorriaren eta urdinaren artean. Azkenean, talde urdina izan da garaile.
Gazteek goiz ederra igaro dute, giro onean, eta esan bezala, orain herri bazkaria egiten ari dira. Iluntzean igoko dute Martina sorgina, festei amaiera emateko. Honakoa da arratsalderako egitaraua:
- 14.00. Herri bazkaria.
- 18.00. Kalejira Iraunkorrak txarangak alaiturik.
- Ondoren. Martina Sorginaren igoera eta agurra.
- 23.30. DJ Naza txosnan.
