Aizkardi Mendi Elkarteak 16. Argazki Rallya antolatu du azaroaren 10erako. Lehiakideek antolakuntzak markatutako mendi ibilbidean atera beharko dituzte argazkiak. Bederatzi kilometroko luzera duen bidean, lau orduko epean atera beharko dituzte argazkiak. Larrea auzoko Aizkardiren aretoan, igandean, 09:00etan eman beharko da izena.
Argazki onenari 150 euro emango zaizkio, bigarrenari 100 euro eta hirugarrenari 75 euro. Publikoak hautatutako argazki onenari ere saria emango zaio, Adunako Aburuza sagardotegian bi lagunentzako afaria. Lanak azaroaren 18tik 22ra Gurea zinema aretoko sarreran erakutsiko dira, Aizkardiren 40. Mendi Astearen barruan.