Amasa-Villabonako Udalak Ibilian programari ekin dio ikasturte berrian, adineko pertsonen artean jarduera fisikoa bultzatzeko eta herritar talde horren artean harreman berriak sustatzeko. Asteazkenean egin zuten lehenengo topaketa Erreboteko plazatik 11:00etan abiatuta.
Adineko pertsonei astero herrian paseoak egiteko aukera eskaintzen die udalak, eta ibilaldia bukatuta, parte hartzaileak salda beroa hartzera gonbidatzen ditu.
Erniobea BHIko eta Zubimusu ikastolako DBHko ikasleek txandaka parte hartuko dute asteroko ibilaldietan boluntario gisa. Modu horretara komunitate giroa sustatu nahi du udalak, belaunaldien arteko elkarreragina eta ikaskuntza bultzatuz.
Udalaz eta ikastetxeez gain, beste hainbat erakundek ere parte hartzen dute ekimen honetan: Santiago egoitzak, Salbadora erretiratuen etxeak, Olaederra kiroldegiak, Uliazpik, Matia fundazioak, Goxarak, Osakidetzak eta Eusko Jaurlaritzak.
«Egiaztatuta dago jarduera fisikoak osasuna hobetzen duela oro har, eta adinekoentzat bereziki onuragarria dela», esan dute ekimenaren bultzatzaileek. Horretaz jabetuta, nabarmendu dute Ibilian programak aukera «paregabea» eskaintzen duela adinekoek paseoak lagunartean egiteko, asteazkenero, ordubetez.
