Ekitaldiz betetako Kirol Astea

I. Kirol Astea egingo da datorren astean Amasa-Villabonan, eta Beatriz Unzue alkateak azaldu du «energiaz beteko» dela herria. «Jarduera fisikoa eta ongizatea sustatzeko diseinatutako ekimena da, eta bidez batez, kirolak osasunean duen garrantzia eta talde-kirolen balioa nabarmendu, gizarte kohesioan eragin eta talde lana sustatu nahi ditu udalak».

Kirol Asteak programazio zabala eskainiko du, eta herrian praktikatu daitezkeen kirolak ezagutzeko aukera emango duela adierazi du Unzuek. «Gainera, kirolak osasunean duen eraginari buruzko hitzaldiak izango dira, tailerrak, irteerak eta baita bigarren eskuko azoka bat ere, kirol artikuluak prezio onenetan erosteko».

Eñaut Zelarain kirol zinegotziak gaineratu duenez, antolakuntza herriko hainbat elkarterekin lankidetzan izan da posible: «Urte osoan erakusten duten bezalaxe, ekitaldi eta jarduera hauek eskaintzeko konpromisoa eta dedikazioa erakutsi dute kirol elkarteek, eta udala benetan harro eta eskertuta dago hori guztiagatik». Egitaraua herrian dagoen kirol aukera zabalaren erakusle dela azaldu du Zelarainek. Besteak beste, euskal pilota, halterofilia, txirrindularitza, Nordik Walking, edota boleibola bezalako kirolak ezagutzeko aukera eskainiko du Kirol Asteak, baita Olaederra Kiroldegian eskaintzen diren ikastaroak ere.

Aipamen berezia merezi du, Zelarainen esanetan, Minbiziaren Aurkako Elkarteak antolatu duen I. Mendi Martxak: «Irailaren 28ko ekintza honekin minbiziaren gaixotasunaren inguruko tabu soziala desagerrarazi nahi da, eta udalak herritar guztiak animatu nahi ditu ekintza solidario honetan parte hartzera». Horrez gain, irailaren 27an, ostirala, Erremontari Herriz Herri erremonte profesionalaren jaialdia ere izango da Villabonako pilotalekuan, «adin guztietako herritarren gozamenerako».

Unzue alkateak udalaren izenean egitasmoa antolatzerakoan parte hartu duten herriko kirol elkarte guztiei esker ona adierazi die. «Harro egotekoa da komunitatearen mesedetan lan egiten duten talde konprometituak izatea». Era berean, dei egin die Amasa-Villabonako herritar guztiei «kirolaren ospakizun honetan parte hartzera. Pertsona bakoitzaren egoera fisikoak ez du axola, garrantzitsuena parte hartzea eta kirolarekin gozatzea da; Kirol Aste hau guztiontzat irekia da». Unzuek gaineratu duenez, «gure bizi kalitatean garrantzia berezia du kirolak eta onura esanguratsuak ditu gure osasunean, beraz, ez galdu parte hartzeko aukera eta gozatu ekintza desberdinez jositako kirol aste honekin».

Egitaraua

Irailak 23, astelehena