Larunbatean, hilak 14, Txakolin Eguna ospatuko dute Amasan. Hirugarrenez Sega Txapelketa Herrikoia izango dute 16:30etik aurrera eta 9 parte hartzaile izango dira: Mikel Arretxe, Kepa Nazabal, Jon Beldarrain, Arkaitz Arretxe, Joseba Astiasaran, Joseba Otegi, Julen Etxeberria, Jon Ezeiza eta Kepa Otegi. Sega proba nazioarteko eran egingo dute; alegia, azkartasuna eta txukuntasuna hartuko dituzte kontuan. Sailkapen proban 100 metro koadroko saila moztu beharko dute. Lau segalari hoberenak finalera pasako dira eta bertan, 200 metro koadrokoa izango da moztu beharko duten saila.
Sega txapelketa eta gero dastatu ahal izango dira Getariako izendapeneneko txakolinak, aurten gainera, lehen aldiz bertako txekorra erreko dute goizean goizetik, eta txakolinarekin batera dastatu ahal izango da pintxo modura. Kopa eta 2 pintxo 6 euroren truke eskuratu ahal izango dira.