Lau egunetan zehar izan da zertaz gozatu Villabonan. Izan ere, Villabonako Irrintzi Elkarteak urtero antolatzen duen Garagardo Azoka ospatu dute, eta hain justu, atzo eman zioten amaiera. Aurten, 27. edizioa izan dute, eta urteroko moduan «arrakasta handia» izan duela diote antolatzaileek.
Aurten ere garagardoa izan da azokako protagonista, eta guztira, 23 garagardo mota ezberdin egon dira; 14 arrunta eta 9 berezi. Tragoarekin batera mokadutxo bat jan nahi zuenak ere izan du horretarako aukera. Horretako, ukondoa izan ohi da azokako bigarren protagonista, eta aurten 2.500 ukondo inguru zerbitzatu dituzte. Horrez gain, alemaniar saltxitxak, gulak, kroketak, errusiar entsalada, muskuiluak tomatearekin eta langostinoak baratxuri erara, gazta eta tiramisuarekin batera ere izan dira aukeran.
Atzo ere herritar ugari gerturatu ziren bertara, eta giro ederrean eman zioten amaiera festari. «Mila esker lau egun hauetan azokara gerturatu zareten guztioi. Polita izan da beste urte batez», adierazi dute Irrintzi Elkartetik.