Eusko Jaurlaritzaren Segurtasun Sailak jakitera eman duenez, gertakaria gaur, 04:00ak aldera, izan da, Villabonako Kale Nagusian. Ertzaintzaren patruilak Villabonara joan dira, laban batekin egindako eraso baten berri izan ostean. Anbulantzia bateko osasun-langileek ezkerreko izterrean zauria zuen gazte bat artatu eta eraman dute.
Ustezko erasotzailea Kale Nagusiko atari batean zegoen babestuta eta, lekukoen arabera, bi arma zuri zeramatzan. Hori dela eta, Mugikorreko Bizkor patruila batek esku hartu behar izan duela jakinarazi du Ertzaintzak. Antza denez, atxilotuak liskarren bat izan du Villabonako jai-eremuan. Atxilotua osasun-zentro batera eraman dute lehenengo eta ertzain-etxera gero, beharrezko eginbideak amaitutakoan epailearen esku uzteko.