Guztira 250 dantzari kalez kale, Arroa plazatik abiatuta. Kalejirak ordubeteko iraupena izan du; geldialdietan dantzariek euren trebezia erakutsi diete bertaratutakoei, asko eta asko, ikasleen senideak. Txulalai dantzak, ezpata-dantzak, inauteri dantzak, aurreskuak... ez dira falta izan gaurko errepertorioan.
Argi geratu da, beste behin, Oinkari dantza taldeak duen harrobia; ez soilik Villabonan, baita inguruko hainbat herrietan ere. Izan ere, Oinkari dantza eskolak Alegian, Areson, Lizartzan, Asteasun eta Adunan ere klaseak eskaintzen ditu. Aipatu herrietako ordezkariek ez dute hutsik egin gaurko Dantzari Egunean. Aurtengoan, huts egin dutenak ordea, Oinkari dantza taldeko helduak izan dira, arratsaldean Errotan ikuskizuna eskaini behar zutela eta.
Oinkari dantza taldeko Eneko Arteagak gaurko egunaren garrantzia azpimarratu nahi izan du: «Helburua da dantzari txiki hauei urtean zehar, ikasturte erdi aldera, ikuskizun txiki bat eskaintzeko aukera ematea». Honela, eguna Errebote plazan amaitu dute hamasei bat dantza eskainiz, 250 dantzarien parte hartzearekin, bertan bilduriko publikoaren aurrean.
