Eskuz banaka, larunbatean, 11:30ean Irurako trinketean Gipuzkoako finala jokatuko du Arkaitz Esnaolak nagusien 2. mailan Hernaniko Manterolaren aurka. Irabaziz gero, datorren urtean lehen mailan jokatuko du. Julen Urruzola Behar Zanako pilotariak lehen mailan postua mantentzea lortu du, beraz, bi plaza-pilotari izango lituzke klubak, eskuz binaka dituen moduan. Larunbat arratsaldean, Mallabian, Emakumezkoen Euskadiko X. Paleta Irekiko finala jokatuko dute 3. mailan Oberenakoen aurka Araitz eta Haizea Aldazabal ahizpek.
Larunbatean ere, joko garbiko Gipuzkoako finalak jokatuko dira Zubietan, 16:00etan hasita. Alebin mailan Ekhi Garmendiak, Xuban Artolak eta Oier Dieguezek jokatuko dute Zubietako Alberdi, Larrarte eta Ormazabal hirukotearen aurka. Jaialdi berean, jubenil mailan Pello eta Asier Aranburu anaiek Zubietako Urdalleta-Zabaletaren aurka jokatuko dute.
Igandean, Irurako trinketean Gipuzkoako eskuz banakako finalak izango dira kadete eta jubenil mailan eta hor ere Behar Zanako bi pilotari izango dira. 11:00etan hasita, kadete mailan Adur Otaegik Hernaniko Osesen aurka jokatuko du eta jarraian Inhar Iparragirrek Epleko Lizarazuren aurka jokatuko du.