Chakib Lachgar errenteriara izan da Behobia-Donostia lasterketako irabazlea, errekorra ezarriz gainera, ordubetetik beherako denbora egin baitu, 59:56, hain zuzen. Lachgar 50 kilometroko munduko txapeldun izan berri da Indian. Zakariya El Boubekraoui izan da bigarren 1:01:28ko denbora eginez, eta hirugarren Nan Oliberas Font izan da, 1:02:00 eginez.
Emakumezkoetan Laura Rodriguez helmugaratu da lehen postuan, 1:14:20ko denbora eginez. Sara Villasante de la Fuente izan da bigarren 1:14:28 denborarekin, eta Pilar Fernandez Rodriguez hirugarren 1:14:47 denborarekin.
Iraitz Arrospide billabonatarrak 1:02:36ko denbora egin du, laugarren geratuz. Lesio baten ondotik zetorren billabonatarra, eta probaren amaieran pozik agertu da lortutakoarekin. Podiumetik oso gertu geratu arren oraindik hobetzeko aukera baduela ikusi duela esan du, eta hurrengo erronka Sevillako maratoia duela.
Behobia (Gipuzkoa) eta Donostia arteko 20 kilometroak 25.636 lagunek egin dituzte aurten; 29.639 zeuden izena emanda, eta 253 erretiratu egin dira. Inoiz baino gehiago izan dira emakumeak: 7.482. Parte hartzaileen %29 izan dira.