Uxo Toki elkarteak urtero Txakolin Eguna antolatzen du Amasan. Getariko izendapena duten txakolin ezberdinak dastatzeko aukera izaten da bertan, herritarrek prestatutako pintxoekin batera. Aurten, 28 upategitako txakolinak dastatu ahal izan dira. Jaia girotzeko DJ Markel aritu da musika jartzen.
Txakolin dastaketaren aurretik sega txapelketa herrikoiak deitu du bertaratutakoen arreta. Zortzi amasar aritu dira eta hiru txandatan banatuta 100 metro karratuko saila ebaki behar izan dute nazioarteko eran. Lau onenak finalera pasa dira eta 200 metroko saila ebaki behar izan dute. Hauxe izan da sailkapena:
- Luis Mari Otegi
- Mikel Arretxe
- Kepa Nazabal
- Joseba Otegi
Jendetza gerturatu da, eguraldia lagun, sega txapelketa herrikoia ikustera, eta ondoren, txakolina dastatzeko plazan bildu dira amasarrak eta bisitariak.
