Adinduen Eguna ospatu zuten atzo Zestoan, eta arratsaldean, Zestoako Trikitixa kultur elkarteak antolatuta, Trikitilari Gazteen XI. Txapelketa jokatu zuten 20 urtez azpiko bost bikotek, plazan elkartu ziren ehunka lagunen aurrean. Trikiti, fandango eta arin-arin pieza bana jo zituzten trikitilariek.
Epaimahaiak hala ebatzita, Irati Arcelus lazkaotarra eta Mirari Plazaola arrasatearra nagusitu ziren txapelketan, 121 punturekin. Janire Segurola hernaniarra eta Elaia Diaz astigartarra izan ziren bigarren, 116,5 punturekin; hirugarren Maitane Iturrioz billabonatarra eta Eider Amenabar errenteriarra izan ziren, 109 puntu eskuratuta. Araitz Etxaniz eta Onditz Alberdi azkoitiarrak zein Ane Urbieta eta Maialen Larrañaga zestoarrak izan ziren txapelketan parte hartu zuten beste bi bikoteak, eta antolatzaileek herrikideei banatzen dizkieten Zestoako Saria jaso zuten azken bi musikari horiek.