Behar Zana elkartearekin batera, Gipuzkoako beste bi talde ariko dira, Oiartzungo Txost eta Zubieta. Horiekin batera Lapurdiko hiru talde ariko dira: Luzean (Donibane Lohizune), Kapito Harri (Uztaritze) eta Kanboarrak (Kanbo). Bi multzotan parte hartuko dute; A multzoan, Luzean, Kapito Harri eta Txost taldeak izango dira, eta B multzoan Kanboarrak, Behar Zana eta Zubieta.
Lehenik, itzuli bateko ligaxka jokatuko dute multzo bakoitzean, irailaren 3ko jardunaldian hasi eta irailaren 17kora bitartean. Partida guztiak Oiartzungo, Villabonako eta Zubietako plazetan izango dira. Bigarren faseari ekingo diote ondoren: final-laurdenak, finalerdiak eta finala. Multzo bakoitzeko lehen sailkatuak finalerdietara pasatuko dira zuzenean, eta bigarren eta hirugarren sailkatuek final-laurdenetan neurtu beharko dituzte indarrak finalerdietako beste txartelak lortzeko. Finalerdietan, A3 vs B2 partidako irabazleak A1en kontra jokatu beharko du, eta A2 vs B3 partidako irabazleak B1en aurka. Eguraldiak ez badu baldintzatzen txapelketaren martxa, irailaren 24ko asteburuan izango dira ikusgai final-laurdenak eta urriaren 1ekoan finalerdiak. Eta irabazleek, hala, urriaren 8ko jardunaldian jokatuko lukete finala, Villabonako Errebote plazan.