Zunbeltz elkarteak Santiotako kros herrikoia antolatu du uztailaren 25erako. Aurtengoa 41. edizioa izango da. Izena www.herrikrosa.com webgunean eman behar da eta dohainik izango da; lasterketa egunera arte erabilgarri egongo da izena emateko aukera. Dortsala lasterketa egunean banatuko dute elkartean.
Korrikalariak 11:00etan abiatuko dira Zunbeltz elkartearen paretik eta Villabonako kaleetan zehar osatuko dute ibilbidea. 2007an eta 2008an jaiotakoek itzuli bat emango diote ibilbide nagusiari (2,5 kilometro). 2005ean eta 2006an jaiotakoek bi itzuli emango dizkiote (5 kilometro), eta 2004an eta aurretik jaiotakoek hiru itzuli emango dizkiote (7,5 kilometro).
Sariei dagokienez, lehen sailkatuentzat garaikurrak izango dira, gazteen eta helduen kategorian. Haurren krosean, parte hartzaile guztien artean lau sari zozkatuko dituzte.
Haurren krosa
14 urte artekoentzat ere haurren krosa antolatu dute. Kros nagusiaren aurretik izango da, 10:15etatik aurrera; izen ematea elkartean bertan izango da, 9:15etik aurrera.
Adin tarte bakoitzak bere ibilbidea osatuko du. 2013tik aurrera jaiotakoek itzuli bat emango diote ibilbide txikiari; 10:15ean hasiko da eta proba kontrolatua izango da. 2011n eta 2012an jaiotakoek bi itzuli emango dizkiote; 10:30ean hasiko da. Azkenik, 2009an eta 2010ean jaiotakoek itzuli bat emango diote ibilbide nagusiari (2,5 kilometro); 10:45ean hasiko da.