Ostiralean, Masters Hoberenak txapelketako finala jokatu zen Arrangoitzeko trinketean. Eneko Maiz billabonatarrak, Duxassourekin osatu zuen bikotea, eta Larralde-Lambert bikoaren aurka jokatu zuten. Lan handia egin behar izan zuten lau pilotariek, ia bi ordu iraun baitzuen finalak. 5-0 aurreratu ziren markagailuan txapeldunak, baina aurkariek azkar erantzun zuten, eta 16-12 jarri ziren aurretik.
Partidaren bigarren zatia are gogorragoa izan zen. Nekea ere nabari zitzaien lau pilotariei, Maizek amaieran adierazi zuen bezala: «Partida oso gogorra izan da. Hasieran nekatu egin naiz eta pixkanaka hobeto sartu naiz partidan. Baptistak (Ducassou) oso ondo jokatu du, %200a eman du, eta oso pozik nago berarekin jokatzeagatik».
Galtzaileak 28-25 aurreratu baziren ere, 35nako berdinketarekin, argi geratu zen parekotasun handia izan zela bi bikoteen artean. Azken tantoetan, gehiago asmatu zuten irabazleek, eta amaieran, 40-38 irabazi zuten.
Ikusi hemen finaleko tantoak:
Baionako Masters Txapelketan
Frantziako Pilota Federazioak antolatuta, Baionako festen barruan, Binakako Masters Txapelketa jokatuko du Maizek, uztaileko azken astean. Finalerdiak uztailaren 26an eta 27an izango dira, eta finala, hilaren 30ean. Luis Sanchezekin osatuko du bikotea, eta Echeverria-Ducassou bikotearen aurka jokatuko dute. Beste finalerdia Ospital-Lambert eta Larralde-Iphar bikoteek jokatuko dute.