Eskualdeko hiru segalari aritu dira lehian: Jokin Etxeberria amasarra, Mikel Lizartza tolosarra eta Oier Urkola anoetarra. Julen Gabirondo urnietarrak ere parte hartu behar zuen, baina lesio baten ondorioz, ezin izan du. 1.000 metro karratuko saila txukun eta azkar moztu behar zuten parte hartzaileek, eta horretan irabazle izan da amasarra, 28 minutu eta 28 segundoko denborarekin.
Irabazita toki guztietan ondo sentitzen dela aitortu du irabazleak, "baina etxean gusturago. Izan ere, ordu asko pasa ditugu larre honen bueltan, eta pozik bukatu dut". Lizartza izan zen iazko txapelduna eta probaren hasieratik maila bat ateratzea lortu dio Etxeberriak. "Atzo egin zuen euri zaparradak larreari mesede egin dio, hezetasun handia zegoen azpian eta larrea oso xamurra zegoen horretarako", gehitu du.
Lizartza izan da lanak amaitzen bigarrena, 32 minutu eta 26 segundoko denborarekin. Atzetik, kostata baina lanak guztiz amaitzea lortu ditu Urkolak, 38 minutu eta 37 segundoko denborarekin.