Hegoaldeko bikoteak finalean Peio Larralde eta Peio Guichandut bikoari 40-36 irabazi zion. Partida oso borrokatua izan zen, Maiz eta Sanchezen aurkariak estu jarraitu baitzieten neurketa osoan zehar. Luis Sanchez izendatu zuten txapelketako jokalari onena.
XI. Antton Pebeten Oroimenezkoa, martxan
Pasa den abenduan X. edizioa ospatu eta gero, Antton Pebeten Oroimenezkoa Txapelketa dataz aldatuko zuela iragarri zuen Behar Zana Pilota Elkarteak. «Txapelketa ofizialen egutegi luzaketa eta txapelketa pribatuen saturazioak erabaki hori hartzera behartu gintuen. Orain, txapelketa erakargarriago batekin gaudelakoan gaude», azaldu dute. 40 bikotek baino gehiagok parte hartuko dute txapelketaren edizio berrian. Atzo hasi zen eta uztailaren 30era bitarte luzatuko da.
Lehen kanporaketaren barruan, bi partida jokatu ziren atzo. Batetik, Altunak eta Gabirondok 22-13 irabazi zieten Eskuderori eta Aranbururi. Berez, bihar zegoen iragarrita partida hau, baina atzo jokatu zuten. Irabazleek, Elizalde-Gurrea bikotearen aurka jokatuko dute hurrengo kanporaketan. Bestetik, Orbegozo-Aranburu bikoteak aise hartu zuen mendean Iraola-Olaiz bikotea: 22-6. Hurrengo kanporaketan, Irribarria-A. Garmendia bikotearen aurka jokatuko du.
