Usoen populazioa hazten ari da azken aldian Villabonako hirigunean. Kale Nagusia 62-68 eraikinak bota zirenetik udalaren ustez, "begi bistakoa" da inguru horretan dagoen kopuru handia. Beraz, gobernu taldeak hegazti hauen populazioa gutxitzeko helburuarekin, enpresa bat kontratatu du.
Usoen gehiegizko populazioak ondorio kaltegarriak izan ditzakeela uste dute udal arduradunek: "Sortzen dituzten gorotzak korrosiboak direnez, eraikinen fatxadak, kaleetako lurzorua edota autoen txapak kaltetzen dituzte, besteak beste".
Udaleko Ingurumen saila lanean ari da egoera hau kontrolatzeko eta hainbat neurri aplikatuko ditu usoak harrapatu eta herriko kaleetatik ateratzeko. Desinfecciones Eibar enpresa kontratatu du hegazti hauen gainpopulazioa gutxitzeko. Esku-hartze honek 7.260 euroko aurrekontua izango du, eta usoen %80a murriztuko dela aurreikusten dute udal arduradunek.