Dagoeneko ohiturazkoa bihurtu da Oinkari dantza taldearen Dantzari Eguna. Honela, gaurkoan herri guztia kutsatu dute euskal dantzekin.
Arroa plazatik abiatu dira, 11:30ak aldera, lehenik han dantza erakustaldia eskaini dutela. Erdi aldera jo dute, segizioan. Artzain-andre jantziak jantzirik, alpargatak oinetan eta dantzarako prest. Dantzari txikiek gurasoak ondoan izan dituzte, plazaz plaza.
Herrian barrean beste bi geldiune egin eta azkenik pilotalekura iritsi dira. Dantza erakustaldia eskaini aurretik, hamaiketakoa eginez, indarrak hartu eta berriro ere dantzarako prest ziren Oinkariren ikasleak.
Ane Urruzola Oinkari kide eta irakasleak jakinarazi bezala, 260 haurren bueltan parte hartu dute gaurko ospakizun egunean. Villabonako dantzariez gain, ohiturazkoa den moduan, hainbat herri izan dituzte gonbidatu moduan. Asteasu, Lizartza, Alegia, Aduna eta Aresotik gerturatu dira Villabonara dantza ikuskizuna eskaintzera. Herrien aukeraketaz galdetzerakoan honakoa zehaztu du Urruzolak: "Oinkariko irakasleak herriz herri ibiltzen gara dantza klaseak eskainiz; herri horietatik etorri dira dantzariak".
Pilotalekua lepo, musikariak oholtza gainean eta dantzariak kantxa erdian dantzan ikuskizuna eskainiz. Bertaratutakoen lana ordea, dantzak txalotzea izan da.
