Villabonan egoitza duen Oriaibaia Nordic Walking elkarteak hainbat ekitaldi antolatu ditu Villabonan, interesa duen orok Nordic Walking modalitatearen ezagutza izateko. Urtean zehar hainbat ekintza bideratzeko diru laguntza onartu dio Amasa-Villabonako Udalak Oriaibaia elkarteari. Hori dela eta, elkarteak Villabonan bertan kirol honen berri eman nahi izan du, asteburu osoa ipar martxari eskainiz.
Bihar, larunbata, 10:00etatik 12:00etara Ipar Martxa edota Nordic Walking kirola ezagutzeko tailerrak egongo dira Erreboteko Plazan. Oriaibaia Elkarteko bideratzaileak diren Juanma Mujika eta Ana Bengoa arituko dira herritarrei Ipar Martxako teknikak irakasten. Doako ikastaroa izango da eta bastoiak Oriaibaia elkarteak utziko dizkie bertaratzen direnei. Parte hartzen dutenei, gainera, buff bat oparituko die elkarteak. Bestetik, Gipuzkoako Foru Aldundiko kirol zuzendaritzak, Emakumeok Mugimenduan programa dela eta, kirola egiteko prestatu duen App bat mugikorrean instalatuz programa honetan parte hartzen dutenei, mugikorra eramateko gerriko bana oparituko die.
Bestalde, 19:00etan, Gurea zinema aretoan, Cristina Gonzalez Castroren hitzaldia izango da. Nordic Walking modalitateko ariketek hainbat minbizitan duen eraginari buruzko jakintzan aditua da Gonzalez eta Oriaibaia elkartetik adierazi duenez, «esfortzu berezia» egin dute aditu hau Villabonan izan dadin.
Asteburua borobiltzeko, igandean, Ipar Martxako irteera bat egingo dute Villabonan zehar, 10:00etan Erreboteko plazatik abiatuta. Irteera honetan parte hartzen dutenei ere buff bana oparituko die elkarteak. «Animatu eta etor zaitez osasunerako hain onuragarria den kirol hau gertutik ezagutzera!».