Aipatu moduan, Urtzain taldea Oria ibaia eta hainbat mendi bazter garbitzen aritu da azken hilabeteotan. Oria ibaiari dagokionean, Antzibarko presa inguruak (Argaitz industrialdean), eta Ubilluts aldean Ubegungo zonaldea txukundu dira. Gainera, Sacemetik Zizurkilgo mugarainoko ezkerraldeko ertza, Irurako mugatik Aizpuruko zubirainoko eremua, eta harrizko zubitik Agaraitzerainoko eskubialdeko ertza ere garbitu dira. Bestetik, mendialdean atzemandako legez kanpoko bi hondakin pilaketa erretiratu dira: Guardetxera doan bidean A15 errepideko zubia pasa eta eskuineko aldean lehenengoa, eta Komizarko parkeko eremua zegoena ondoren (Komizar ondoko basoan).
Aipagarria da mota guztietako kale hondakinak identifikatu eta jaso direla, besteak beste, 260 metalezko lata, kamioi eta auto gurpilak, telebista bat, 40 zabor poltsa, koltxoiak eta abar. Bildutako material guztia zegokion edukiontzietan sailkatu ondoren, Tolosaldeko mankomunitateak dituen bi Garbiguneetara eraman dira, bertan hondakin mota bakoitzak dagokion tratamendua izan dezan.
Udalak ingurumenarekiko gutxieneko errespetua eta mendi, erreka, edo ibai bazterretan hondakinik ez botatzea exijitzen die herritar guztiei. Ingurune naturalak kutsatzen dituzten jokabide penagarriekin amaitzeko ordua baita. Zentzudunak izateaz gain, eremu natural guztiak garbi garbi eta txukun mantentzea eskatu dute, guztion hobe beharrerako.