Gaur izan da epaiketa Gipuzkoako Probintzia Auzitegian; akusatuak egindakoa onartu du eta akordio batera heldu da fiskaltzarekin: sei urteko kartzela-zigorra urtebete eta erdira jaitsi diote, osasun publikoaren aurkako eta trafikoaren segurtasunaren aurkako delitu bana egotzita; azken honekin, gainera, urtebeterako gidabaimena kendu diote.
Auzipetuari espetxe-zigorra kentzeko aukera gaineratu du auzitegiak, baldin eta hurrengo bi urteetan deliturik berriz egiten ez badu eta epe horretan gidatzeko debekua betetzen badu.
Herri-salataritzaren akusazio-idazkiaren arabera, gertaerak 2021eko martxoaren 4ko goizaldeko ordubatean jazo ziren. Erruztatua, «sustantzia sorgorgarriak irensteagatik, ahalmen urriarekin» ari zen autoa gidatzen.
Poliziak, orduan, «droga-kontsumoarekin bateragarriak diren sintomak» antzeman zizkion, eta listu-test bat egin zion; metanfetaminan eta kokainan positibo eman zuen.
Hori dela eta, poliziak miaketa bat abiatu zuen, eta hainbat poltsa aurkitu zizkioten antefetaminarekin eta kanabis-erretxinarekin, legez kanpoko merkatuan 245 euroko balioa izango luketenak.