Amasa-Villabonako Lurgatz talde feministak zaintzaren gaia aztertuko du abenduaren 15ean Subijana etxean antolatutako jardunaldi batean. "Mugimendu feministan zaintza erdigunean kokatua dugu eta gaia sustraietatik heltzearen beharra ikusten dugu", esan dute talde feministatik. 18:30etatik aurrera egingo dute mahai ingurua eta bertan parte hartzera deitu dituzte herritarrak.
Jardunaldi honetan parte hartuko dute Sos Arrazakeriako Tatiana Bellorinek eta Jone Urionaguenak. Etxe barneko langileek bizi dituzten baldintza prekarioen inguruan hitz egingo dute eta baldintza horiek familiekin batera lan eginez nola hobetu daitezkeen azalduko dute. Bestalde, Matia Fundazioko etxeko eta komunitateko arreta zuzendari den Maider Azurmendik ere hartuko du parte saioan.
Lurgatz talde feministak aipatu duenez, Euskal Herrian zaintza zerbitzuak emateko enpresa, elkarte eta fundazio ezberdinak daude. Adinduei edota lanerako ezintasun osoa duten pertsonei babesa ematen diete eta enpresa hauen artean eredu ezberdinak topa daitezke. Eredu horietan sakontzeko jardunaldia izango da abenduaren 15ekoa. Dena den, Lurgatzek guztion "interdependentzia" azpimarratu eta mahai gaineratu nahi du Villabonan antolatutako jardunaldian: "Zaintzan denok gure eskubide zein betebeharrak ditugu".