Odol Emaileen Elkarteak 9 odol emaile omendu ditu Amasa-Villabonako udal aretoan izandako aitortza ekitaldian. Odol emaileen elkarteko Amasa-Villabonako boluntarioez gain, Beatriz Unzue alkateak eta Arantza Lopez Gizarte Zerbitzuetako zinegotziak ere ekitaldian parte hartu dute. Esker oneko hitzak egin dituzte, "odol emaileen elkartasunari esker bizitza ugari salbatzen direlako". Ekitaldian 25, 40, 60, 75 eta 80 aldiz odola eman duten 9 emaile izan dira.
Beatriz Unzue alkateak gogora ekarri du, Amasa-Villabonako, eta oro har, Aiztondo bailarako herritarrek egin duten ekarpena eredugarria izan dela eta beste behin, eta esker hitzak izan ditu bai odol emaileentzat, baita elkarteko boluntarioentzat ere: "Gure gizarteak asko zor dizue. Zuen odolari esker pertsona askoren bizitzak salbatu dituzue eta hori harro egotekoa da".
Bi hilabetez behin, Amasa-Villabonan bertan odola emateko aukera. Hilabete bikoitietako azken ostiraletan Gurea antzokiko erakusketa gelan eman daiteke odola, 16:30etik 20:30era, beti ere, aurrez, 943 00 78 88 telefonora deitu eta hitzordua eskatuta. Amasa-Villabonako hurrengo odol emateak abenduaren 30ean egingo dira.