Indarkeria matxistak hil dituen emakumeak eta indarkeria bikarioagatik eraildako haurrak ekarri ditu gogora gaur Amasa-Villabonako Udalak. Zubimusu, Fleming eta Erniobea ikastetxeetako ikasleek sortutako tximeletekin jantzi dute Berdura plazan jarri duten horma-irudia. Ekitaldian udal ordezkariekin batera Santiago egoitzak, Helduen Heziketa Iraunkorreko zentroak eta herriko beste zenbait eragilek hartu dute parte eta Amaia Agirre herriko bertsolariak egun honetarako propio sortutako bertsoak kantatu dituzte elkarrekin, ekimenari amaiera emateko.
Amasa-Villabonako Udalak indarkeria matxista pairatzen duten edo sufritu duten emakume zein haur guztiekiko elkartasuna adierazi du, eta bide batez, azpimarratu du indarkeria matxista kasuak ez direla erailketak soilik. Tratu txarrak, etxeko indarkeria, umiliazioak, kontrola … ere indarkeria matxista dira", aipatu du Beatriz Unzue alkateak.
Amaitzeko, Amasa-Villabonako Udalak gaur arratsaldean Aiztondoko Mugimendu Feministak antolatutako elkarretaratze ibiltariarekin bat egin eta herritarrei protesta ekimen horietan aktiboki parte hartzeko gonbita luzatu die. "Emakumeen aurkako indarkeria salatzeko beharrezkoa da herritar guztion indarrak batzea. Indarkeria matxistari aurre egitea denon ardura da", aipatu dute udal ordezkariek.
Argazkiak: Amasa-Villabonako Udala
