Iñigo Guridi Lasa euskal preso billabonatarra Leongo Mansillan dago eta Espainiako Espetxe Zuzendaritzak gaur jakinarazi duenez, Euskal Herriko espetxe batera ekarriko dute. Eusko Jaurlaritzak argitu beharko du orain Martutenen, Basaurin edo Zaballan sartuko duten.
Guridirekin batera, beste bost preso ekarriko dituzte EAEko espetxeetara: Asier Badiola Lasarte (Kantabriako Dueson daukate); Iñaki Bilbao Goikoetxea (Salamancako Topasen); Orkatz Gallastegi Sodupe (Salamancako Topasen); Fermin Vila Mitxelena (Zaragozako Zueran); eta Iñigo Zapirain Romano (Dueson).
Beste preso bat, Alberto Viedma Morillas nafarra, Salamancako Topasetik Iruñeko kartzelara lekualdatuko dute. Espetxe Zuzendaritzak aipatzen duenez, zigorraren hirugarren laurdenak hilabete honetan beteko ditu Viedmak.
Lekualdaketa hauek gauzatzen direnean, ez da euskal presorik geratuko Topas eta Zuerako espetxeetan. Euskal Herriratzearen ondoren, 20 preso baino gutxiago izango dira Euskal Herritik kanpo gelditzen diren presoak, Espainiako zortzi espetxetan sakabanatuak.