Biolur Elkarteak, Villabonako Udalarekin eta Euskadiko Nekazaritza eta elikadura ekologikoaren kontseiluaren lankidetzarekin, Elikagai ekologikoen azoka antolatu du gaur Errebote plazan. Abuztuaren amaieratik urriaren azken asteraino astebururo Euskal Herriko 13 herri desberdinetan izan dira azokak, eta 2022ko Udako Azoka Ekologikoen martxaren azken geldialdia izan da gaurkoa.
Azokan barazkiak, ardi-ahuntz eta behi-gazta, eztia, ogia, marmeladak, olioa, eta beste hainbat elikagai izan dira nagusi. Gainera, nekazaritza eta elikadura ekologikoari buruzko informazio-panelak eta Biolurren informazio puntua ere egon dira bisitarientzako. Gosez zegoena tripa betetzeko aukera ere izan du Ama tabernako Javi Rivero eta Gorka Ricoren pintxo dastaketarekin.
Gaztetxoentzako eskaintza ere bazegoen. Izan ere, Gau Beltzerako kalabazak dekoratzeko tailerra ere izan da goiz guztian zehar. Iraia Cambra bakarlariak kontzertua eskaini du, eta bere doinuek girotu dute azoka.