Azken egunetako euriak ibilbidea lokaztuta utzi duen arren, parte hartzaile ugarik hartu dute irteera IV. BTT Martxan. Batzuk ibilbide luzea aukeratu dute, 38 kilometroa. Errebote plazatik abiatu ondoren Amasa igotzen hasi dira. Hortik Belabietara, eta bueltan, Loatzotik barrena, irteera puntura iritsiko dira. Bataz besteko malda positiboa 1.400 metrokoa topatuko dute. Ibilbide laburrekoek 10 kilometro gutxiago egingo dituzte, baina bataz besteko malda mila metrotik gorakoa izango dute.
Adin guztietako bizikleta zaleak agertu dira irteera puntura. Bizikleta elektrikoarekin ere parte hartzeko aukera zegoenez, hain sasoiko ez zeudenak ere gustura ikusten ziren. Ibilbidean zehar hiru anoa gune izango dituzte, eta helmugan, hamaiketako ederra. Bizikleta garbitzeko eta dutxa bat hartzeko aukera ere jarri dute Irrintziko kideek.