Itziar Gastearenak (Amasa-Villabona, 1993), erronka berri bati ekin dio. Hilabete hasieran aurkeztu zuen Granada futbol taldeak bere fitxaketa, eta jada Andaluziako taldearekin ari da entrenatzen. Aurtengo denboraldian, beraz, Reto Iberdrola Ligan (Bigarren Mailan) jokatuko du Gastearenak. Esperientzia berria izaten ari da, inoiz ez baitzuen Euskal Herritik kanpoko talde batean jokatu, eta beraz, hau du bere lehen aldia etxetik urrun.
Azken denboraldian, Gasteizko Alaves Gloriosas taldean jokatu du Iberdrola Ligan (Lehen Mailan), baina ez ditu nahi adina minutu izan berdegune barruan (bederatzi partidatan jokatu du, ligako zortzitan eta kopako batean), eta beraz, bide berri bati ekitea erabaki du. 2019an heldu zen Gasteizera, eta hiru denboraldi egin ditu bertan. Aurrez, Eibarren, Realean eta Tolosan jokatu zuen billabonatarrak.
Palmaresari dagokionez, Euskal Herria Kopa irabazi zuen Realarekin, 2012an. Gero, 2018-2019 denboraldian, Reto Iberdrola Ligara igotzea lortu zuen Eibarrekin, eta 2020-2021 denboraldian, Reto Iberdrola Ligako txapeldun izan eta Iberdrola Ligara igotzea lortu zuen Alaves Gloriosas taldearekin.