Errebotea Sutan txapelketa atzeratu egin dute eguraldiagatik

Txapelketa jokatzerik izan ez badute ere, joko garbian eta palaz aritu dira goizean zehar Villabonako frontoian.

Errebotea protagonista izatekoa zen, gaur, izen bereko Villabonako plazan, baina eguraldiagatik atzeratu egin behar izan dute. Behar Zana elkartearen 75. urteurrenaren harira antolatu dituzten jardunaldien barruan kokatuta zegoen Errebotea Sutan txapelketa. Iñaki Lizaso Behar Zana elkarteko kideak esan du "erabakitzen" ari direla noiz egin, baina ziurrenik "uda ostean" izango dela. "Horrelako jaialdi bat ezin da ospatu gabe utzi, beraz, ea aurrerago egiteko moduan garen", esan du. 

Hitzordu berezia zen gaurkoa. "Gaur egun errebotean dabiltzanak eta lehen ibili zirenak lotuta genituen, eta pena da eguraldiagatik atzeratu behar izatea". Denera lau talde eta 24 pilotarik hartu behar zuten parte. "Batzuk apropos txapelketa honetarako entrenatzen aritu dira". Hala ere, ez dira besoak gurutzatuta geratu, eta pilotariak goizean goizetik Villabonako plazan elkartu direnez, pilotalekura joan dira eta joko garbian eta palaz aritu dira goizean zehar.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!